في كتير من الكلمات الناس بتقولها في فيسبوك وتويتر على غرار (من الغرغرة) اعلانات كوك زيرو تعليقا على الثورة وما بعدها فانا قلت اكتب بنفس الشكل مستعينا بكثير من كلماتهم:
يعني ايه كوك زيرو
- يعني الجيش يعلن محاكمة مبارك والضباط امام محاكم مدنية ويمسك الناس المدنيين ويحاكمهم عسكريا
- يعني النيابة تخلي سبيل الضباط اللي قتلوا المتظاهرين وتتابع التحقيق معهم من غير احتجاز وتحتجز المدنيين المتظاهرين لحين انتهاء التحقيقات
- يعني الناس تروح تقول نعم في التعديلات الدستورية والجيش هيعمل اعلان دستوري كان في حالة الناس تقول لا
- يعني عمرو موسي يحاول أجهاض الثورة و بعدها يترشح للرئاسه
- يعني الإنجليز اللي احتلونا70سنة بيطالبوا بحقهم مقلدين ثورتنا والجيش بيطلب مننا نتظاهر زي الأجانب عشان الإستكرار
- يعني محافظ يشارك ف مسيرة بتطالب بعودة الشرطة
- يعني أول ما نسمع أن ايناس الدغيدي حتسيب البلد عشان الاخوان .. نلاقي 80 مليون مؤيد للأخوان
- يعني نعمل ثورة ونشيل مبارك علشان ما بيستجيبش لمطالب المحتجين ونجيب عصام شرف... يقوم يمنع الاحتجاجات من أصله
- يعني مبارك يتنحي عن حكم مصر من القاهرة ويحكمها من شرم
- يعني شعب مصر يعمل ثورة ناجحة ، والجزائر وسوريا تلغي قانون الطواري
- يعني الشعب يستنى الإعلان الدستوري .. يقوم الجيش منزل قانون الأحزاب
- يعني يحبسوا روبي عشان 200 ألف جنيه وسايبين عز وجرانة ومغربي ومبارك علي 900 مليار جنيه
- يعنى بعد الثورة متنجح محمود سعد يمشي .... وتامر وخيري هما الى يقعدوا
- يعني حسن شحاته المصري يروح مصطفى محمود و جوزيه البرتغالي ينزل يحاول يتبرع بالدم لمصابي التحرير و ينزل ينضف مع الناس الشارع
- يعني القلة المندسة هي اللي تعمل الثورة و تفضل برضه هي القلة المندسة
- يعني يقولك ماس كهربائي في التكييف واحنا في شهر مارس
- يعني احمد شفيق بيتحقق معاه فى اكتر من 24 بلاغ فساد وفى ناس لسه بترشحو للرئاسه و وبتجمعله توقيعات
- يعنى مبارك يمشى والبلطجية بتوعة لسة موجودين
- يعني حمادة هلال يكتشف لوحده ان شهداء 25 يناير ماتوا في أحداث يناير
- يعني طلاب الاخوان يعملوا مؤتمر في الجامعة والأمن يوصلهم الكهربا بتاعة السماعات
- يعنى كل المصريين اللى بره عاوزين يرجعوا مصر يعيشوا و يتمتعوا بالحرية فيها و حسام حسن يهدد بالهجرة
- يعني عسكري يمشي بالدبابه عكس السير وتسمع سواق تاكسي بيقول : تـلاقي اٌمه اللي جيبهاله
- يعني في السنه اللي طلعوا فيها وثائق ويكيليكس ... احنا طلعنا وثائق امن الدوله
- يعني امن الدولة يتلغي ويتعمل امن وطني بنفس الضباط وفي نفس المقرات
- يعني فتحي سرور يتكلم عن تزويرالإنتخابات
- يعني الإخوان المسلمين يجتمعوا بالمجلس العسكري وأمن الدولة يصبح تنظيم محظور
- يعني الجيش يبعتلك مسجات أكتر من حبيبتك
- يعني تفقد ذاكرتك وتلاقي امن الدولة محتفظالك بنسخة منها
- يعني التراس زملكاوي يعترض لاول مره في التاريخ على ابراهيم حسن ويطالبه بالاعتذار
- يعني الاخوان يحضروا قداس والشباب يضرب تموره
- يعني البرادعي يطلع عالتلفزيون عادي ومبارك مش لاقي محامي يدافع عنه
- يعني فردة الشبشب إللي ضاعت في مصيف اولي ثانوي تلاقيها في أمن الدوله
- يعني أمن الدولة يبقى عارف المزة بتاعتك سابتك ليه وإنت لسة مش عارف
- يعنى تمورة يعيط و الرجل الى ورا عمر سليمان هو الى يتشهر
- يعني احنا نعمل ثورة والمساجين هما إللي يتحرروا
- يعني تلاقي واحد معتبش التحرير و يحكيلك اللي حصل بالظبط و يحلف عليه
- يعنى لما تشترى أى جورنال متلقيش ملطوع فى أول صفحة: الرئيس مبارك يلتقى بعاهل المملكة
- يعني أجي اكلمك عن ناس بتموت...وأنت تقولي خلاص حوزع عليهم بنبوني
- يعني الرئيس مبارك يمشي واسامة سرايا والقط لسه رؤساء تحرير لحد دلوقتي
- يعنى الراجل اللى ورا عمر سليمان وبلوفر شفيق أشهر من نائب الرئيس و رئيس الوزراء السابق
- يعنى الناس تعترض على ترشىح البرادى ويسيبوا عمرو مصطفى ىرشح نقسه
- يعني الناس تشوف البرادعي عميل وتشوف مبارك ابونا الحنون
- يعني نسيب الثورة و نسأل هو البنات اللي كانت في التحرير ده ملهاش أهل
- يعني تامر آمين يرقص ويطبل للحكومة قبل التنحي وبعد التنحي يطلع يقولنا عفا الله عما سلف
- يعني التليفزيون والاهرام يساوي مظاهرات التحرير المليونية بالف واحد في مصطفي محمود
- يعني لاول مره تلاقي رئيس وزراء بيقول في التلفزيون : مليش فيه يا علاء
- يعني تغيير شعار الشرطة للشرطة في عرض الشعب
- يعني تلاقي رئيس وزراء قاتل واتقتل قبل كده
- يعني تبقى الناس قاعدة في التحرير ...و رئيس الوزرا يقولك انا كنت قاعد مع الشباب في الفورسيسون
- يعنى البرادعى يقول ان التغيير قادم لامحاله وموسى يقول الطريق للرئاسه مقفول والناس ترشح موسى
- يعنى تنسى باسوورد الايميل بتاعك .. و أمن الدولة يرجعهولك
- يعني مصر تشوط تلاتين كورة على الجول و تونس تفوز بفارق اهداف كبير
- يعني مبارك يطالب بمحاكمة عادلة له
- يعني تقول لأمك أنا نازل مظاهرة تقولك استنى ألبس وآجي معاك
- يعني أم الشهيد مش عارفة تأخذ حقها وأم جمال تصرف فلوس مكتبة أسكندرية
- يعني تبقى ظابط في أمن الدولة قاعد في المقر بتاعاك ويجيلك مدنيين على الفجر عشان يعتقلوك
- يعني تلاقي كل الأمهات عاملين أكونت علي الفيس بوك
وهي دي الثورة مع كوك زيرو
ليست هناك تعليقات:
إرسال تعليق